नेपालको फराकिलो जित र यूएईको फराकिलो हारले मात्र नेपालको एसिया कपको यात्रा तय हुने

४ खेल सकिँदासमेत नेट रनरेटमा नेपाल चार टोलीमध्ये पछाडि

सुरुवाती दुई खेलको पराजयले नेपालको एसिया कप खेल्ने सम्भावनालाई न्यून बनाए पनि मलेसिया र सिंगापुरमाथिको जितसँगै आशा कायम राखेको छ ।
नेपालले नयाँ यात्राका लागि मंगलबार हङकङविरुद्ध फराकिलो जित निकाल्नुपर्नेछ भने अन्य टोलीको प्रदर्शनमा समेत भर पर्नुपर्नेछ । किनकी सबै टोलीको एक खेल बाँकी छ र ६ मध्ये ४ टोलीको फाइनल पुग्ने सम्भावना कायमै छ ।

गत महिना नेदरल्याण्ड्सविरुद्ध एकदिवसीय सिरिज डेब्यु गरेर बराबरी खेलेको नेपाली टोली अहिले मलेसियामा छ । विश्व क्रिकेटका महारथी भारत र पाकिस्तानसँग एसिया कप खेल्ने अवसरको खोजीमा छ नेपाल । ४ खेल सकिँदासम्म ओमान ७ अंकसहित शिर्षस्थानमा छ । यूएईको ६ अंक छ भने हङकङको पाँच र नेपालको चार अंक छ । नेपालको अघिल्लो यात्राका लागि यूएईले ओमानसँग हार ब्यहोर्नुपर्नेछ । त्यतिमात्र नभई नजिता नेट रनरेटले समेत तय गर्नेछ ।

४ खेल सकिँदासमेत नेट रनरेटमा नेपाल चार टोलीमध्ये पछाडि छ । नेपालको फराकिलो जित र यूएईको फराकिलो हारले नेपालको एसिया कपको यात्रा तय हुनेछ । प्रतियोगिताको शीर्ष स्थानमा रहने टोलीले भारत र पाकिस्तान रहेको समूहबाट एसिया कपमा स्थान बनाउनेछ । प्रतियोगिता अन्तिम चरणमा आइपुग्दा रोमान्चक बनेको छ । नेपालको दोस्रो जित अनि शिर्ष स्थानमा रहेको ओमानले हङकङसँग अंक बाँडेसँगै प्रतियोगिता थप रोमान्चक बनेको हो ।