बुधबार, भाद्र ३ २०८३
बिचार खबर
महिला उद्यमशीलता तथा निजी क्षेत्रको विकासमा योगदान पुर्याउँदै आउनुभएकी सफल व्यवस्थापक उर्मिला श्रेष्ठ लाई ‘ग्लोबल स्टार सर्वोत्कृष्ट व्यवस्थापक तथा राष्ट्रसेवक सम्मान’ प्रदान गरिएको छ । व्यावसायिक दक्षता, संस्थागत नेतृत्व, सामाजिक उत्तरदायित्व तथा राष्ट्र निर्माणमा पुर्याएको योगदानको कदरस्वरूप श्रेष्ठलाई उक्त सम्मान प्रदान गरिएको आयोजकले जनाएको छ ।
लामो समयदेखि उद्योग, व्यापार तथा व्यवस्थापन क्षेत्रमा सक्रिय श्रेष्ठ हाल नेपाल चेम्बर अफ कमर्सकी उपाध्यक्ष, महिला चेम्बरकी अध्यक्ष तथा साल्ट ट्रेडिङ कर्पोरेशन लिमिटेड प्रमुख कार्यकारी अधिकृतको जिम्मेवारीमा रहनुभएको छ ।
उहाँको नेतृत्वमा निजी क्षेत्रको सुदृढीकरण, महिला उद्यमशीलताको प्रवर्द्धन, संस्थागत सुशासन तथा आर्थिक विकासका क्षेत्रमा महत्वपूर्ण उपलब्धि हासिल भएको बताइएको छ । विशेषगरी महिलालाई आत्मनिर्भर र उद्यमशील बनाउन उहाँले खेलेको भूमिका प्रेरणादायी मानिएको आयोजकको भनाइ छ ।
दूरदर्शी सोच, अनुशासित कार्यशैली तथा प्रभावकारी नेतृत्व क्षमताका कारण श्रेष्ठ नेपाली निजी क्षेत्रको सफल महिला नेतृत्वका रूपमा स्थापित भएको उल्लेख गरिएको छ । महिला नेतृत्व अभिवृद्धि तथा आर्थिक सशक्तीकरणमा उनको योगदान उल्लेखनीय रहेको जनाइएको छ ।
सामाजिक सेवामा समेत सक्रिय श्रेष्ठले शिक्षा, स्वास्थ्य, महिला सशक्तीकरण तथा विपद् व्यवस्थापनका क्षेत्रमा योगदान पुर्याउँदै आउनुभएको छ । विभिन्न राष्ट्रिय तथा अन्तर्राष्ट्रिय मञ्चहरूमा उहाँले नेपालको निजी क्षेत्र, महिला उद्यमशीलता तथा व्यापार प्रवर्द्धनका पक्षमा सक्रिय भूमिका निर्वाह गर्दै आउनुभएको छ ।
यसअघि पनि श्रेष्ठ विभिन्न राष्ट्रिय तथा अन्तर्राष्ट्रिय संस्थाबाट सम्मानित भइसक्नुभएको छ । महिला सशक्तीकरण, उद्यमशीलता विकास, सामाजिक उत्तरदायित्व तथा उत्कृष्ट व्यवस्थापकीय क्षमताका लागि उहाँलाई राष्ट्रिय महिला आयोग लगायत संस्थाले सम्मान गरिसकेका छन् । साथै युनिभर्सल वर्ल्ड बुक अफ रेकर्ड बाट समेत उहाँ सम्मानित भइसक्नु भएको छ ।
७५ वर्ष लामो इतिहास बोकेको नेपाल चेम्बर अफ कमर्समा पहिलोपटक महिलाको तर्फबाट उपाध्यक्ष बन्ने गौरवसमेत श्रेष्ठले हासिल गर्नुभएको छ । उक्त उपलब्धिलाई नेपाली निजी क्षेत्र तथा महिला नेतृत्वका लागि ऐतिहासिक र प्रेरणादायी कदमका रूपमा हेरिएको छ ।
© 2026 All right reserved to bicharkhabar.com | Site By : sobij
